Grüäziwohl
S'Huus vom Restaurant Rechberg isch 1837 baut worde. D'Ziit vor de Industrialisierig isch interessant im Bezug uf Läbesmittel. Ufem Märt isch z'finde gsi, was d'Saison und d‘Region hergeh händ. S'Agebot vo de no chline Höf us de Umgebig hät hauptsächlich us ursprüngliche Gmüessorte und Fleisch vo iheimische Tier bestande.
Inspiriert dur d'Epoche vo de Erbauig vom Rechberg, händ mir euis entschiede, mit Produkt z'schaffe, wo i de damalige Ziit erhältlich gsi sind. Mit ziitgemässe Technike verarbeitet mier die Produkt zunere innovative Traditionschuchi.
Begleitend zu euisere Chuchi büted mier es usgwählts Agebot vo usschliesslich Schwiizer Getränk a. Vo Süessgetränk über Spirituose bis hi zum Wii: Hinter allem was mier usschänked, stönd lokali Produzänte mit Liib und Seel.
Will nüt de Geist vonere Region meh beläbt als Kultur, nutzed mir d'Sämstige für bsunderi Abigaläss. Dur es Zämebringe vo Kunst und Kulinarik schaffäd mier es einzigartigs kulturells Erläbnis im intimä Rahme.
Mier freuded euis druf das mit Eui z'teile.